Statsbudsjettet fra A til Å

Klikk på første bokstav i det ordet du leter etter eller søk på ordet her.


Sámegiella

Sámediggi

Sámediggi oažžu jahkásaš juolludemiid máŋgga departemeanttain, ja hálddaša bušeahtaárvalusa mielde sullii 334 miljovnna ruvnno sámi ulbmiliidda 2009:s, mii lea 23 miljovnna ruvnno lassáneapmi 2008 rájes.

Ráđđehus árvala ahte Sámediggái juolluduvvo 203,7 miljovnna ruvdno 2009:s Bargo- ja searvadahttindepartemeanta bušeahta bakte. Sámediggi lea bušeahttamearrádusain earret eará vuoruhan sámi giela ja buohtalasealáhusaid árvoháhkanprográmma, vrd. kap. 18 áššis 60/07 Sámedikki 2008 bušeahtta. Sámedikkis lea hui guovddáš sajádat sámegiela barggus. Áŋgiruššama oppalaš juolludeamis 8 miljovnna ruvnnos sámegiela doaibmaplána bargui Bargo- ja searvadahttindepartemeanta bušeahta bakte (vrd. kap. 681, poasta 72 Sámi giella, diehtojuohkin), árvala departemeanta danin ahte 5 miljovnna ruvdno sirdojuvvo Sámediggái. Viidáset ráđđehus lea gearggus miehtat Sámedikki sávaldaga ahte ain ovdánahttit buohtalasealáhusaid árvoháhkanprográmma 2 miljovnna ruvnnuin. Dán vuođul departemeanta árvala lasihit Sámedikki bušeahttarámma 7 miljovnna ruvnnuin 2009:is. Juolludanárvalus sisttisdoallá maiddái 1,5 miljovnna ruvnno viessoláigobuhtadasa danin go Sámedikki kantuvrrat Guovdageainnus galget fárret ođđa dieđalaš vistái go dat gárvána 2009 geasi. Sámediggi bivddii ráđđádallančoahkkimis Bargo- ja searvadahttindepartemeanttain 2008 miessemánus ahte 1,5 miljovnna ruvdno juolluduvvo Njávdámii gullii dákteriggeávdnasiid ođđasis hávdádeapmái. Plánaid mielde galget dákteriggeávdnasat, mat vurkkoduvvojit Oslo Universitehtas, ođđasis hávdáduvvot skoaltagávpoga hávdesadjái Njávdámis. Ráđđehus árvala ahte 2009:is juolluduvvo 1,5 miljovnna ruvdno dán ulbmilii. Viidáset árvaluvvo 2,9 miljovnna ruvdno 2009:is juolluduvvot Sámedikki bargui 2009 sámediggeválggaid čađahanbargguide. Geahča lagabui máinnašeami

St.prp.nr.1 (2008-2009) Bargo- ja searvadahttindepartemeanta , kap. 680 Sámediggi, poasta 50 Sámediggi.

Ráđđehus árvala lasihit juolludeami sámi kulturulbmiliidda 8,45 miljovnna ruvnnuin 62 miljovnna ruvdnui Kultur- ja girkodepartemeanta bušeahta bakte. Juolludanárvalus fátmmasta 450 000 ruvnno Nuortanástái. Geahča máinnašeami St.prp.nr.1 (2008-2009) Kultur- ja girkodepartemeanta, kap. 320 Dábálaš kulturulbmilat, poasta 53 Sámi kulturulbmilat.